Во ноември и декември, Советот за соработка со и развој на граѓанскиот сектор ги одржа 17-та седница и 18-та (дописна) седница.
На редовната седница, меѓу другото се дискутираше и за нацрт-анализата за финансиската поддршка на здруженијата и фондациите од Буџетот со Компаративна анализа на моделите за државно финансирање од другите земји и Предлог-моделот за Фонд за институционална поддршка на граѓанските организации и ко-финансирање на ЕУ-проектите во Македонија и Нацрт-планот за комуникација на Советот.
Во периодот 12-15 ноември, МЦМС и Одделението за соработка со НВО организираа три консултативни средби со граѓанските организации за предлог-приоритетните цели за Програмата за финансирање на програмските активности на здруженијата и фондациите за 2020 година.
На 27 ноември, петнаесет претставници од десетина медиумски организации и институции (ЗНМ, ЦРМ, МИМ, БИРН, Метаморфозис, Совет за етика во медиуми, ССНМ, ИРЛ, АВМУ, Инбокс 7), во организација на НВО Инфоцентарот и Транспарентност Македонија, дискутираа за финансирањето на медиумите од јавни средства, за опасностите од корупција и самокорупција на медиумите, како и за начините/механизмите за поддршка на медиумите, но и минимизирање на ризиците од влијание на власта, политичките партии и центрите на моќ врз новинарите и медиумите на национално и локално ниво.
На 27 ноември, десет мрежи на невладини организации, на прес конференција повикаа на итен избор и именување на кадри во повеќе институции и тела од страна на собраниската Комисија за прашања на изборите и именувањата.
На 27 ноември, Го Грин организираше јавна трибина за шест нови предлог закони за отпад предложени од Министерството за животна средина и просторно планирање.
На 13 декември, во Скопје, Регионалната мрежа за развој и интегритет на Југоисточна Европа (СЕЛДИ) и Платформата на граѓански организации за борба против корупцијата организираа регионален форум за борба против корупцијата.
На 18 декември, Центарот за економски анализи – Скопје (ЦЕА) и Институтот за демократија „Социетас Цивлис“ (ИДСЦС) ја одржа завршната конференција „Проценка на влијание на регулатива – Суштински процес или формалност?“, во рамки на проектот „Проценка на влијанието на регулативата во сенка: Промовирање на креирање на политики базирани на докази“, финансиски поддржан од Делегацијата на Европската Унија во Скопје.
На 23 декември, регионалниот проект ТАКСО организираше средба со граѓанските организации за презентирање на Нацрт извештајот за проценка на потребите на граѓанското општество од Западен Балкан и Турција, со фокус на Македонија, за прибирање коментари од клучните засегнати страни и валидација на наодите од истражувањето.
На 24 декември, Иницијативниот одбор за формирање мрежа на граѓански организации за Отворено владино партнерство одржа средба со претставници од Министерството за информатичко општество и администрација и Комисијата за заштита на правото за слободен пристап до информациите од јавен карактер. Оваа иницијална средба имаше за цел започнување на процесот на консултации за потребата, улогата и постапката за воспоставување нова структура за координација на процесот на ОВП во државата.
На 25 декември, Министерството за информатичко општество и администрација ја претстави надградбата на ЕНЕР. Фокусот е ставен на консултациите со сите засегнати страни при сите фази на креирање на политики и донесување на закони. Надградбата треба да овозможи комуникација и на останатите материјали што институциите ги подготвуваат, како и електронско поднесување на иницијативи од граѓаните и граѓанските организации.
На 25 декември, Националната мрежа против насилство врз жени и семејно насилство ја презентираше анализата на тема „Родовиот аспект и жртвите на родово базирано и семејно насилство во Законот за социјална заштита на Република Северна Македонија“.
|