На својата единаесетта седница, одржана на 19-ти март, членовите на Советот за соработка со и развој на граѓанскиот сектор меѓу другото дискутираа и за Информацијата за финансиската поддршка на здруженија и фондации од Буџетот во 2018 година и планирани средства во 2019 година. Според оваа информација подготвена од Одделението за соработка со НВО, во 2018 година се доделени вкупно 428.903.454,00 денари финансиска поддршка на 888 здруженија и фондации, од кои 389.990.426,00 денари се доделени по пат на јавен оглас на 853 здруженија и фондации а 37.857.781,00 денари се доделени без јавен оглас на 35 здруженија и фондации. Документот содржи информации и за планираните средства за финансиска поддршка на здруженија и фондации за 2019 година.
Според нацрт-записникот од оваа седница на Советот, Советот го задолжи Одделението за соработка со НВО да ја дополни Информацијата со податоци за: правниот основ за финансиска поддршка на граѓанските организации кај одделните институции, консултации со организациите при утврдување на приоритетите за финансирање, начинот на објавување на огласите, учество на граѓанските организации во комисиите за евалуација, објавување на одлуките за распределба и причини (правен основ) за доделување на финансиски средства без јавен оглас.
На 25 февруари во просториите на Граѓанскиот ресурсен центар во Скопје се одржа првата средба меѓу новиот состав на Државната комисија за спречување на корупцијата (ДКСК) и Платформата на граѓански организации за борба против корупција, на која се дискутираа идеи за соработка и синергија во кои со здружени сили можат поефикасно да се борат против корупцијата.
Новиот состав на ДКСК беше избрани преку потранспарентна постапка за избор во која претставници на граѓанските организации беа активно вклучени. Постапката за избор беше направена согласно новиот Закон за спречување на корупцијата и судирот на интереси кој што стапи на сила во јануари 2019 год.
|